من الأشياء اللي مسيطرة على تفكيري موضوع المواصفات الشكلية النموذجية اللي بتفرض علينا و بتسيطر على نظرتنا للأشخاص و تقييمنا ليهم ، و المشكلة ان المواصفات دي من صنع الإعلام و الأفلام و مسلسلات التليفزيون. فهم يصورون الشاب الوسيم ذو العضلات المفتولة والصدر الواسع و الكتاف العريضة و العيون العميقة الجريئة بأنه هو مصدر النجاح و الاهتمام و التهافت من قبل الجميلات و الفاتنات و هذا المثال موجود منذ القدم من أيام الأبيض و اسود ( فرانك سيناترا ، كلينت استوود ، مارلون براندو ، رشدي أباظة ) و الآن طبعا ( توم كروز ، جورج كلوني ، أحمد عز ، تامر زفت حسني ، أحمد أسامة طبعا!!!) ... يعني اللي عايز أقوله ان مقاييس الكمال الشكلي و الجسدي بالنسبة للرجال هي هي من زمان ، و طبعا نتيجة لتراكمات الضغط الإعلامي في هذا الاتجاه ، صدق الناس الخدعة ، و أصبح من مقاييس 99% من البنات في الراجل اللي بتحبه أنه يكون شبه المقاطيع اللي فوق ، طبعا لا يمنع تغير ترتيب أولوية المقياس ده حسب كمية الأفكار المحترمة اللي جوة دماغ البنت. أما لو جينا بالنسبة لمواصفات الحريم فالموضوع أكبر بكتير جدا ، و بلاش الواحد يقول أسماء علشان مراتي ممكن تقرا المقالة دي و لو شافتني باتكلم عن اليزابيث تايلور أو أنجلينا جولي أو الست هيفاء بتاعة الواوا حيطلع لي واوا ! و طبعا ده برضه انعكس على مقاييس الرجال في الاختيار يعني 98% من الرجال و هم بيتجوزوا بيدوروا على حاجات شكلية معينة في خيالهم تعباهم و نفسهم فيها. الراجل فينا بيدور على واحدة مزة شكلا ، مع أنه لو قعد مع الحشو من غير شكل مش حيطيق يقعد 5 دقايق. و ده في غالب الأحوال.
يعني الخلاصة ان مقاييس الإعلام التي فرضتها علينا و التي لا تنطبق في الواقع إلا على 3-5% من مجمل الناس جعلت الناس في سباق محموم حتى يقتربوا من هذا المقياس ، و جعل الناس يفرحوا جدا لو عندهم بنوتة شبه الممثلة الفلانية و طبعا البنت يركبها الغرور و تبطل تشغل مخها علشان جمالها بيسهل لها كل حاجة و تفتكر العرسان واقفين على الصفين و هو ده اللي بيحصل فعلا للأسف.
و المشكلة ان الموضوع ده ليه جانب اقتصادي مهم جدا، يعني فلوس الناس التي تضيع على مراكز التجميل ، و عمليات التجميل ، و منتجات الريجيم ، كل ده مش هدفه ان الناس يكونوا أصح ، و لا ان الست عايزة جوزها يشوفها أحسن (إلا استثناءات قليلة) الموضوع ان الفلوس دي بتتصرف علشان الناس تقرب من النموذج المثالي اللي مزروع في مخهم و علشان المجتمع الهايف بتاعنا يتقبلهم بشكل أحسن لأن منظرهم اتحسن. يعني البنت بتروح الجيم مش علشان صحتها تتحسن ، لا ، علشان تدير الرؤوس وهي ماشية أو علشان تكون أحلى من صاحباتها و هي معاهم ، و الواد اللي بيفحت نفسه في الحديد ، مش بيعمل كده علشان جسم أصح ، لا ، علشان يستعرض الباي و التراي قدام اللي يسوى واللي مايسواش. المشكلة ان الناس بتدور على تحسين القشرة، و مش بتدور على تظبيط الحشو أو الجوهر ، زي اللي عمل ديكور على أعلى مستوى لبيت آيل للسقوط أو مليان حشرات !
الجانب الاجتماعي في الموضوع أخطر من الاقتصادي ، بغض النظر عن موضوع الزواج ، الموضوع موضوع توقع الناس من أشكال معينة يعني الشخص التخين لازم يكون كسلان ، الشخص القصير لازم يكون مكير ، و هكذا و هكذا و تصور بقى لو واحد عنده عيب خلقي أو بيعرج أو عنده حرق في مكان ظاهر من جسمه ، الناس مش بتتعامل معاه طبيعي ، مع أنه ممكن تكون دماغه تعمل 5 مليون من واحد زي رشدي أباظة مثلا. المجتمع وقع أسير المواصفات الشكلية و أصبح يتعامل مع الناس بناء على مظهرهم الخارجي. و على قدر اقترابك من المواصفات القياسية الزائفة على قدر تقبل المجتمع لك و انفتاح الأبواب لك و زيادة فرصك في النجاح.
اللي عايز أقوله ان المواصفات الصح مش مركزين عليها اليومين دول ، يعني مثلا الرجل في الميزان الصحيح هو الرجل الحقيقي الذي يعيش حياة متوازنة و يقيم بيته بشكل يرضيه و يرضي ربه ، لو تحبوا نتكلم عن الرجالة الصح هناك آلاف و ملايين الأمثلة التي عاشت و ماتت في هدوء ، لم تركز عليهم كاميرا ، و لم قوموا بعمل شو يبهروا به الناس ، و لكنهم عاشوا حياتهم بكل بساطة ، أثروا فيمن حولهم ، و عاشوا لقضية عليا ، أو لهدف نبيل (حتى لو كان هذا الهدف هو تربية الأولاد و تنشئتهم و النجاة بهم من هذا الزمن الغريب).
و طبعا نفس الكلام على النساء. كم من سيدات بالنسبة للمواصفات العالمية لا يصلحون و لكن بالنسبة للمواصفات الصحيحة هن زوجات و أمهات مثاليات. مش معنى هذا الكلام ان المرأة صاحبة المواصفات القياسية لا يمكن أن تكون أما جيدة أو زوجة ناجحة أو امرأة صاحبة رسالة و لكن المهم أن الشكل الخارجي مالوش دعوة بالموضوع. الجمال الخارجي و المواصفات الرهيبة دي مجرد قشرة خارجية مصيرها الذبول مع الزمن و الدود في القبر، و لو مش مصدقين كلامي اتفرجوا على صباح و شويكار الآن و قارنوهم بالأبيض و اسود. يا جماعة خلاصة الكلام ان المواصفات الصح هي المواصفات اللي قالها ربنا سبحانه و تعالى في القران ( إن أكرمكم عند الله أتقاكم) ، مش أنعمكم شعرا و لا أعرضكم كتفا و لا أجملكم عيونا ، يا جماعة ركزوا على المضمون و كفاية انسياق و راء موصفات زرعوها في دماغنا منذ الصغر. أريد أن أسأل نحن نعرف شكل كام نبي من الأنبياء ؟ وهل الموضوع مهم فعلا ؟؟ لم يشر الله سبحانه و تعالى إلى شكل نبي من الأنبياء عدا سيدنا يوسف ( أشار إلى حسنه النبي صلى الله عليه و سلم في الحديث الشريف) وذلك لأن شكله مرتبط بالقصة الأساسية له و التي تعلمنا العفة في وجه المغريات. فكم منا سيكون مطمعا للنساء مثل سيدنا يوسف ، و كم منا سيصمد مثله؟
شفت من كام سنة فيلم جميل جدا اسمه (هالو شال*) وهو بيتعرض لنفس النقطة اللي عمال أرغي فيها من الصبح أنصح بمشاهدته ، فعلا فيلم فكرته جميلة جدا و يستحق المشاهدة أكثر من مرة.
زمان كان علماء السلف لهم مصطلح جميل جدا يصف الذي يحب امرأة لشكلها الجميل و الفاتن بأنه من (عشاق الصور)... وهو ده آخر الكلام.
الإثنين يوليو 07, 2008 7:04 pm
